Քորպտիկ, մաշկային հիվանդությունների (նեյրոդերմատոզների) խումբ, որի հիմնական ախտանշանը նոպայաձև ուժեղ քորն է՝ բշտիկահանգուցիկային տարրերի հետագա զարգացմամբ։ Առաջացման պատճառներ Նյարդային և ալերգիական գործոնները, որոշ ներքին օրգանների գործունեության խանգարումները, քրոնիկական բորբոքային օջախները՝ ժառանգական նախատրամադրվածության պայմաններում։

Տեսակներ Մանկական քորպտիկ, կամ մանկական մոլաքոր, նկատվում է վաղ հասակում, հաճախ կյանքի առաջին տարում։ Ախտածնության մեջ կարևոր են որոշ սննդանյութերի (հաճախ՝ մայրական կամ կովի կաթի, ցիտրուսների, ձվի և այլն) և դեղանյութերի հանդեպ առաջացող գերզգայնաթյունը, օրգանիզմի ինքնաթունավորումներն ու ինքնագերզգայնացումը։ Հիվանդությունը բնորոշվում է մաշկի տարբեր հատվածներում բշտիկահանգուցիկային տարրերի և եղնջացանի առաջացմամբ։ Հիվանդության ընթացքը երկարատև է։ Հետևողական բուժման ու հսկողության բացակայության դեպքում այն վերածվում է չափահասների քորի։ Չափահասների քոր, բնորոշ են կոնաձև կամ կիսագնդաձև, մինչև կորեկի հատիկի մեծության հանգուցիկները։ Հանգուցիկային քոր, հանդիպում է առավել հաճախ, բնորոշ է միջին տարիքի կանանց և արտահայտվում է սահմանափակ քանակությամբ հանգույցներով, որոնք տեղակայվում են սովորաբար ստորին ծայրանդամների տարածիչ մակերեսների վրա։ Հիվանդության ընթացքը երկարատև է, կրկնումները հաճախ լինում են հոգեկան սթրեսների ու մոծակների խայթոցների հետևանքով։ Բուժում Բուժումը խիստ անհատական է․ սննդաբուժություն (բեռնաթափման օրերի նշանակում՝ համեմունքների ու գրգռիչ սննդանյութերի, ածխաջրերի և այլն սահմանափակում)։ Վիտամիններով հարուստ սնունդ, բուսական յուղ, մրգեր (խնձոր), մածուն, կեֆիր և այլն։

© 2016-2017 - Hospitals.am, Ստեղծված "ԱՐԴԱՍԵ"-ի կողմից

Զանգ օպերատորին      +37460651003